संखुवासभा । खाँदबारी नगरपालिकाले राष्ट्रिय शिक्षा दिवशको अवसरमा नगरभित्रका माध्यमिक विद्यालय बीच युगल नृत्य प्रतियोगिता आयोजना गरेको छ ।
‘ज्ञान, विज्ञान, सीप, उद्यम र मौलिकता, साझेदारी र प्रणालीगत क्षमता’ भन्ने नाराका साथ खाँदबारी नगरपालिकाको शिक्षा शाखाको आयोजना र हिमालय माध्यमिक विद्यालयको संयोजनमा बुधबार युगल नृत्य प्रतियोगिताको आयोजना गरिएको हो । नगरभित्र रहेका १९ वटा माध्यमिक विद्यालयहरु मध्ये १७ वटा माविले प्रतियोगितामा सहभागिता जनाएका थिए । प्रतियोगितामा खाँदबारीको हिमालय माध्यमिकले प्रथम स्थान हासिल गरेको थियो भने दोस्रो, तेस्रो र सान्त्वना क्रमशः मनकामना रत्नअम्बिका मावि तुम्लिङटार, आदर्श विद्यामन्दिर मावि पाठकगाउँ र हिमालय मावि आंला भएका थिए । प्रतियोगिताका प्रथम हुनेले नगद १० हजार रुपैया र दोस्रो, तेस्रो र सान्त्वना हुनेले क्रमशः नगद ७ हजार, ५ हजार र ३ हजार रुपैया पुरस्कार प्राप्त गरेका थिए ।
उक्त कार्यक्रमको अध्यक्षता खाँदबारी नगर शिक्षा समिति सदस्य तथा हिमालय माध्यमिक विद्यालयका विद्यालय ब्यवस्थापन समितिका अध्यक्ष शेरबहादुर पराजुली (अर्जुन)ले गरेका थिए भने कार्यक्रममा प्रमुख अतिथि खाँदबारी कार्यवहाक नगर प्रमुख महेश्वरा श्रेष्ठ बज्राचार्य रहेकी थिइन् । त्यसका साथै कार्यक्रममा जिल्ला शिक्षा समन्वय इकाइ संखुवासभाका प्रमुख गोपालमान भण्डारी, खाँदबारी नगर शिक्षा सामाजिक संयोजक तथा खाँदबारी १ नम्बर वडा अध्यक्ष निरन्जन श्रेष्ठ, नगर शिक्षा युवा तथा खेलकुद शाखा प्रमुख दिपकमणि घिमिरे, हिमालय माविका प्रअ बीरबहादुर राई, नेपाल शिक्षक महासंघका जिल्ला अध्यक्ष सेरबहादुर पुरी लगायतको उपस्थिती रहेको थियो ।
