संखुवासभा । पूर्वी पहाडी जिल्ला संखुवासभाको सदरमुकाममा रहेको हिमालय माध्यमिक विद्यालय खाँदबारीलाई २०६० सालका पूर्वविद्यार्थीहरुले पौने चार लाख रुपैया बराबरको बाजागाजा सहयोग गरेका छन् ।
विद्यालयमा संगित कक्षा सञ्चालनका लागि बजागाजा खरिद गरि हस्तान्तरण गरेको हो । बिहिबार एक कार्यक्रम बीच २०६० सालमा एसएलसी दिएका पूर्वविद्यार्थीहरुले विद्यालयका प्रधानाध्यापक बीरबहादुर राईलाई संगित कक्षा स्थापनार्थ दुई लाख ७५ हजारको बाजागाजा सहयोग गरेको पूर्वविद्यार्थी नवराज कार्कीले बताए । उनको अनुसार, दुई लाख ७५ हजारको बाजागाजा, १ लाख १ हजार १११ रुपैयाको अक्षयकोष स्थापना गरि कुल पौन चार लाख रुपैयाको विद्यालयलाई सहयोग गरेको हो ।
कोषको वार्षिक ब्याजको रकमबाट गीतसंगीतको विधामा अब्बल विद्यार्थीहरु छनोट गरी प्रोत्साहन गरिने कार्कीले बताए ।
संगित कक्षाको व्यवस्थापन गरी परम्परागत पञ्चेबाजाहरु नरसिङ्गा, सहनाई, दमाहा, झ्याम्टा, ट्याम्को, सारङ्गी, बांसुरी, मादल, तबला, हार्मोनियम, किबोर्ड (पियानो), गितार, ड्रमसेट सहितका सांगीतिक सामग्रीहरु विद्यालयलाई हस्तान्तरण गरेको हुन् । २०६० सालका पूर्वविद्यार्थीले करिब तीन लाख ७८ हजार रुपैयाँ सहयोग रकम संकलन गरेका थिए । अझै सो रकम संकलन भइरहेकाले थप संकलित रकमबाट थप बाजागाजाहरु थप्दै जाने २०६० सालमा एसएलसी दिएका पुर्वविद्यार्थीहरुले लक्ष राखेका छन् ।
अरुण उपत्यकाभित्रका विद्यार्थी तथा अभिभावकहरुको पहिलो रोजाइमा रहीआएको पाठशाला हिमालय माध्यमिक विद्यालय हो । २००६ सालमा स्थापना भएको सो विद्यालय जिल्ला सदरमुकाममा भएकाले सबैको मुटु विद्यालयको रुपमा गनिर्दै आएको छ ।
