संखुवासभा । जिल्लाको चैनपुर नगरपालिका–१० स्थित लेवारिङ्गमा रहेको सिंहेश्वरी आधारभूत विद्यालयका विद्यार्थीहरुलाई निःशुल्क रुपमा टाई, बेल्ट र जुत्ता वितरण गरिएको छ ।
सोमबार एक कार्यक्रम बीच विद्यालयमा अध्ययरत रहेका कुल ४८ जना विद्यार्थीहरुलाई निःशुल्क रुपमा टाई, बेल्ट र जुत्ता वितरण गरिएको विद्यालय ब्यबस्थापन समितिका अध्यक्ष गोपाल अधिकारीले बताए । उनले वैदेशिक रोजगारीको सिलसिलामा साउदी अरेवियामा रहेको दुर्गबहादुर अधिकारी र मलेसियामा रहेका उदयचन्द्र अधिकारीसँग समन्वय गरी दाताको सहयोगमा विद्यालयमा अध्ययरत छात्रछात्राहरुलाई निःशुल्क रुपमा टाई, बेल्ट र जुत्ता वितरण गरिएको हो ।
‘विद्यालयमा पढ्ने अधिकाँस बालबालिकाहरुको अवस्था सामान्य छ । ति गरिव र विपन्न बालबालिकाहरुलाई राहत पुगोस् भनेर सबै बालबालिकाहरुलाई नछुट्टाई समान रुपमा सामग्री वितरण गरिएको हो । दुई जना दाताहरुबाट करिब १७ हजार रुपैया बराबरको सामग्री वितरण गरिएको छ । त्यो सामग्रीहरु दाताको बुवाहरुलाई विद्यालयमा बोलाई विद्यार्थीहरुलाई सामग्री वितरण गरिएको हो ।’—विब्यस अध्यक्ष अधिकारीले भने ।
उक्त विद्यालयमा कक्षा १ देखि ५ सम्म पठनपाठन हुने गर्दछ भने विद्यालयमा ६ जना शिक्षकहरु कार्यरत रहेका छन् । विद्यालयको शैक्षिक गुणस्तर, बालमैत्री विद्यालय बनाउन आफु विद्यालयको ब्यबस्थापन समितिको अध्यक्ष भएर आएपछि चिन्तित भएर लागि परेको विब्यस अध्यक्ष अधिकारीको भनाइ छ । उनले निकट भविष्यमा विद्यालयको १ देखि ३ कक्षा सम्म अंग्रेजी माध्यमबाट पठनपाठन लागु गर्ने योजना रहेको बताए ।
उक्त सामग्री वितरण कार्यक्रमका चैनपुर–१० का वडा सदस्य टेकेन्द्र अधिकारी, दाताका बुवाहरु, गाउँका अग्रज तथा भद्रभलादमी बुद्धिजिवी, अभिभावक र विद्यार्थीहरुको उपस्थिती रहेको थियो।
