संखुवासभा । जिल्ला अस्पताल संखुवासभाले आयोजना गरेको विशेषज्ञ स्वास्थ्य शिविरमा १ सय ८६ जना लाभान्वित भएका छन् ।
शुक्रबार संखुवासभाको सदरमुकाम खाँदबारीमा रहेको जिल्ला अस्पतालले विशेषज्ञ स्वास्थ्य शिविरको आयोजना गरेको हो । उक्त शिविरमा छाला सम्बन्धी ७४ जना, नाक, कान, घाँटी सम्बन्धी ८२ जना र नशा तथा मानसिक रोग सम्बन्धी ३० जना गरि कुल १ सय ८६ जना लाभान्वित भएको जिल्ला अस्पताल संखुवासभाका जनस्वास्थ्य निरिक्षक दिपेश श्रेष्ठले बताए । शिविरले धेरै रोगीहरुलाई राहत मिलेको उनले बताए ।
शिविरमा स्वास्थ्य तथा जनसंख्या मन्त्रालयका पूर्वसचिव तथा बरिष्ठ नशा तथा मानसिक रोग विशेषज्ञ डा. रोशन पोखरेल, कोशी अस्पताल विराटनगरका नाक, कान घाँटी रोग विशेषज्ञ डा. रौनक दाहाल र कोशी अस्पताल विराटनगरका छाला रोग विशेषज्ञ डा. असित घिमिरेले चेकजाँच गरेका थिए ।
उक्त शिविरका जिल्लाका विभिन्न ग्रामीण भेगका साथै छिमेकी जिल्ला भोजपुर र धनकुटा लगायतका मानिसहरु स्वास्थ्यमा उपचारका लागि आएका थिए । उक्त विशेषज्ञ सेवा सहितको स्वास्थ्य शिविर सशुल्क आयोजना गरेको हो तर शिविरमा धेरै जति रोगको स्वास्थ वीमा मिल्ने गरि उपचारमा सहयोग गरेको अस्पतालले जनाएको छ ।
स्थानीयहरुले यस्ता विशेषज्ञ स्वास्थ्य शिविर जिल्ला अस्पतालले बेला–बेला खाँदबारीमा नै आयोजना गरिरहे हजारौं रुपैया खर्चेर धरान, विराटनगर र काठमाडौं जानु नपर्ने बताउँछन् ।
