संखुवासभा । माध्यमिक शिक्षा परीक्षा (एसईई) परिक्षा आजदेखि देशभर शुरु हुने भएको छ । संखुवासभाबाट यो बर्ष तीन हजार १२० जना विद्यार्थी सहभागी हुने भएका छन् ।
यो बर्ष संखुवासभाबाट एसईई परिक्षामा नियमित तर्फ दुई हजार ३ सय ९८ जना र ग्रेड बृद्धि तर्फ ७ सय २२ जनाले परिक्षा दिने शिक्षा विकास तथा समन्वय इकाइ संखुवासभाका कार्यालय प्रमुख गोपालमान भण्डारीले बताए । एसईई परिक्षा यहि चैत्र ७ देखि १९ गते सम्म संचालन हुने भएकाले परिक्षालाई शान्तिपूर्ण, ब्यबस्थित र मर्यादित बनाउनका लागि सम्पूर्ण तयारी पूरा भएको कार्यालय प्रमुख भण्डारीले बताए ।
यो बर्ष संखुवासभामा १७ वटा एसईई परिक्षा केन्द्र तोकीएको छ । यो बर्ष हिमालय माध्यमिक विद्यालय खाँदबारीको दुई वटा केन्द्र मध्ये एउटा केन्द्र हटाएको छ भने नुम र बाह्रबिसेमा एक÷एक केन्द्र थप गरिएको कार्यालय प्रमुख भण्डारीले बताए ।
जिल्लाका ७३ वटा माध्यमिक विद्यालय र एउटा खुल्ला विद्यालय गरि ७४ वटा विद्यालयका विद्यार्थीहरु सहभागी हुने शिक्षा विकास तथा समन्वय इकाइ संखुवासभाले जनाएको छ ।
सबै परिक्षा केन्द्र सम्म उत्तरपुस्तिका पुगिसकेको छ । विगतमा जस्तै होमसेन्टर दिएको छैन् भने जुन विद्यालयमा केन्द्र तोकीएको छ सोही विद्यालयका प्रधानाध्यापकलाई केन्द्राध्यक्षको जिम्मेवारी दिएको शिक्षा विकास तथा समन्वय इकाइ संखुवासभाले जनाएको छ ।
