संखुवासभा । जिल्लाको सदरमुकाम खाँदबारीमा आगामी पुस २६ देखि तीनपोखरी कप फुटबल प्रतियोगिता हुने भएको छ ।
तीनपोखरी समाज विकास क्लबले प्रथम आमन्त्रित फुटबल प्रतियोगिता सञ्चालन गर्न लागेको हो । माघेसंक्रान्तिको अवसरमा पर्यटन प्रर्वधन तथा फुटबल खेलको विकास र खेलाडीको व्यवसायीकरण गर्ने उद्देश्यले फुटबल प्रतियोगिता गर्न लागिएको आयोजकले जनाएको छ ।
प्रतियोगितामा सशस्त्र प्रहरी कोशी प्रदेश पकली, इटहरी फुटबल क्लब, भड्साबारी फुटबल क्लब, हिले फुटबल क्लबसहित १२ टिमको सहभागिता रहने अध्यक्ष मिनेस चापागाईले बताए ।
प्रतियोगिताको बिजयी टिमलाई नगद २ लाख २२ हजार २ सय २२ रुपैया सहित ट्रफी, मेडल र प्रमाणपत्र प्रदान गरिने आयोजकले जनाएको छ । उपविजेताले नगद १ लाख ११ हजार १ सय ११ सहित ट्रफी, मेडल र प्रमाणपत्र पाउनेछ ।
उक्त प्रतियोगिता माघ १ गतेसम्म सञ्चालन हुनेछ । खेल खाँदबारी नगरपालिका–७ स्थित खाँदबारी रंगशालामा हुने जनाइएको छ । प्रतियोगितामा २२ लाख रुपैया अनुमानित खर्च हुने आयोजकले जनाएको छ ।
